A Asociación Ambar vai levar a Ribeira e á Pobra do Caramiñal a súa proposta escénica As paisaxes de Camille, homenaxe á escultora francesa Camille Claudel e, tamén, chamada de atención para pecharmos fileiras contra a violencia que se exerce contra as mulleres do noso rural. A primeira das citas será este mércores 24 de novembro ás 12.00 horas no Auditorio Municipal de Ribeira. Un día máis tarde, o Grupo de Artes Escénicas da Asociación Ambar das persoas con diversidade funcional levará As paisaxes de Camille á Pobra do Caramiñal, ás 20.00 horas no Teatro Cine Elma. En ámbolos dous casos, ao remate da función proxectarase un vídeo co proceso de traballo e a conceptualización da peza representada e desenvolverase unha pequena charla.
De xira por Galicia
As paisaxes de Camille chega aos concellos nos que Ambar centra boa parte da súa actividade (ten sedes en Ribeira e na Pobra) logo dunha exitosa xira pola xeografía galega que foi quen de convocar a máis de 100 espectadores e espectadoras. O público estivo composto por usuarias e usuarios de centros educativos, asociacións de persoas con diversidade funcional e representantes dos CIM, Servizos Sociais e alcaldías dos Concellos citados, entre outros.
Como dixemos, o proxecto As paisaxes de Camille foi unha iniciativa para loitar, dende a creatividade, o talento e a reivindicación, contra a violencia de xénero no ámbito rural en calquera das súas manifestacións. En concreto As paisaxes de Camille busca apoderar ás mulleres con diversidade funcional a través da expresión artística, explorando a contención, a rabia, a delicadeza e a sororidade, atravesando a imaxinaría escultórica e a vida da escultora francesa Camille Claudel.
A peza está producida por Ambar, conta coa dirección artística da creadora escénica Helena Salgueiro da plataforma ABAR e cun elenco composto integramente por mulleres con diversidade funcional: Noelia Argibay, Ángeles Devesa, Marina Mondelo, Conchita Mouriño, Carmen Pérez, Olaia Pérez, Montse Queiruga e Mercedes Río.
Esta acción enmarcase no Pacto do Estado contra a violencia de xénero e está financiada pola Axencia Galega de Desenvolvemento Rural.
Para máis información sobre o proxecto cómpre visitar a web de Ambar, no apartado específico sobre o mesmo. As integrantes da asociación tamén subiron ao Youtube un vídeo de presentación.
