O BNG da comarca Muros – Noia organiza este sábado 19 de marzo un acto de homenaxe ao poeta nacionalista Avilés de Taramancos, con motivo do 30 aniversario do seu pasamento. A agrupación, con motivo deste acto de recoñecemento, lembra que Avilés de Taramancos (un dos grandes autores da nosa terra, ao que se lle dedicou o Día das Letras Galegas en 2003), foi concelleiro de Cultura do BNG en Noia entre o ano 1987 e 1991. “Durante os anos que pasou no Goberno local noiés como edil deu un importante impulso á vida cultural do municipio, sendo ademais promotor de iniciativas tan importantes como a Escola Taller que recuperou as primeiras laudas gremiais para a súa exposición, a negociación para a adquisición da que é hoxe a Casa da Cultura que leva o seu nome ou xogando un papel fundamental de cara á adquisición e restauración do Coliseo Noela”, fan saber fontes do BNG da comarca de Muros e Noia.
O acto para homenaxear a súa importante figura como escritor, poeta e nacionalista comezará ás 12 da mañá no Claustro do concello de Noia e rematará con unha ofrenda floral ao carón do busto do poeta na Alameda de Noia.
A homenaxe contará coa presenza de antigos compañeiros e compañeiras de letras, como Cesáreo Sánchez Iglesias, presidente da Asociación de Escritores en Lingua Galega, que tamén presidiu Avilés en 1986, e Ana Romaní, escritora, xornalista e académica de número da Real Academia Galega. Tamén recitarán poemas seus o poeta noiés Manuel López Rodríguez e a poeta e concelleira nacionalista en Porto do Son Patricia Torrado Queiruga. O acto estará presentado polo portavoz municipal do BNG en Noia, Ricardo Suárez, e rematará coa intervención da deputada e escritora nacionalista Mercedes Queixas. A homenaxe estará amenizada pola agrupación musical As Lens.
Á homenaxe está confirmada a asistencia de numerosas personalidades do eido político, cultural e asociativo da comarca, así como de familia e amizades de Avilés de Taramancos.
O BNG quere resaltar, con este acto, “o gran respecto e admiración que ten polo valioso legado literario e político do finado compañeiro Avilés de Taramancos”.
