O 19 de marzo cumpríronse 15 anos do pasamento do músico, co-fundador do grupo Los Tamara e Fillo Predilecto de Noia, Prudencio Romo González. O Concello e a cidadanía quixeron honralo e recordalo nas redes non só polas súas importantes contribucións artísticas, senón tamén por ser un gran recuperador da tradición popular musical da comarca de Noia, ao que cómpre engadir o seu importante labor de difusión da poesía galega.
En palabras do Concello, que recordou a Prudencio Romo nas redes sociais, “no seu amor á música, levou o nome de Noia e Galicia polo mundo, agasallándonos cun traballo cultural que queremos lembrar para que a súa memoria siga viva”.
A súa figura está presente en Noia, dando nome ao Local de Ensaio dende o 2010 e a través da impoñente presenza da escultura que o recorda e lle rende homenaxe na Alameda de Noia. “As súas cancións e letras seguen cantándose e permanecen na memoria de novos e non tan novos”, engaden dende Cultura do Concello.
