Este xoves 31 de marzo celebrouse na sede da Asociación de Empresarios de Ribeira unha xuntanza de traballo cos axentes implicados na organización dunha feira de exaltación dos produtos do mar que se comercializan nas lonxas locais. A reunión contou coa presenza de representantes de OPMEGA (Organización de Produtores do Mexillón de Galicia) e dos patróns maiores de Aguiño e Ribeira. Tamén participaron o xerente da Lonxa de Ribeira e máis directivos da Asociación de Empresarios.
Tratáronse temas relacionados coa preparación da dita feira, un evento de promoción e revitalización do sector pesqueiro e conserveiro que poña en valor os produtos do mar, dinamice a cidade e persista no tempo. Os asistentes á reunión acordaron reunirse novamente para dar forma, data e nome a este evento.
“O noso afán”, sinalou Francisco Martínez Gude, presidente da Asociación de Empresarios de Ribeira, “é traballar para que Ribeira desenvolva o seu potencial e a súa importancia económica e empresarial, e para iso queremos solicitar o apoio, que sen dúbida obteremos, das diferentes institucións da Xunta, Deputación e Concello”.
