Este mércores 2 de marzo comezou no centro de recursos da Asociación Ambar (con sede en Frións, Ribeira) a formación Actividades auxiliares de comercio e entrega e recollida a domicilio. Esta actividade, destinada a persoas con diversidade funcional, busca mellorar a súa empregabilidade aumentando a súa contratación.
A presentación foi encabezada por Milagros Rey, presidenta de Ambar; Ángeles Sampedro, técnica de emprego inclusivo da asociación; Daniel Tojo, orientador laboral de Ambar; e Raquel Riveiro, docente da formación.
Esta formación totalmente gratuíta céntrase en crear un perfil polivalente na área de comercio e está destinada á ocupación de repoñedoras, repartidoras e auxiliares de comercio. Conta cunha fase teoría e outra práctica en empresa.
Esta formación é financiada pola Fundación Once concedida na Convocatoria de Axudas económicas a proxecto de Reforzo da Empregabilidade de Persoas con Discapacidade Uno a Uno do 2021 e enmárcase no Programa de Emprego Operativo de Inclusión Social e Economía Social POISES 2014-2020 co-financiado polo Fondo Social Europeo.
