Ribeira acolle este venres 25 a premier de “Operación Marea Negra”

O Auditorio Municipal de Ribeira vai acoller este venres 25 de febreiro, a partir das 20.00 horas (cunha sesión de photocall), a premier de Operación Marea Negra, unha serie de Ficción Producciones para Amazon Prime Video cuxa estrea na plataforma está programada para o propio día 25.

Entre os actores desta produción audiovisual que está previsto recalarán no noso concello figuran Álex González, Nerea Barros, David Trejos, Manuel Manquiña, Xosé Barato, Yoli Muíños e Carlos Blanco. Tamén se prevé a participación de Mamen Quintas e Julio Casal, produtores executivos da serie, e de Ricardo Carbonero como Head Prime Video Content Spain.

Operación Marea Negra está dirixida por Daniel Calparsoro e inspirada na historia real do primeiro narcosubmariño interceptado en Europa. Ambientada en novembro de 2019, conta as peripecias de tres homes que atravesan o océano Atlántico con tres toneladas de cocaína no interior deste semi-sumerxíbel de construción artesanal. O argumento ponnos de fronte con Nando, o responsábel de guiar o vehículo. Trátase dun mozo galego campión de España de boxeo amateur e mariño experto sen recursos económicos que se ve obrigado a buscar outros medios para gañarse a vida.

A serie está dividida en catro capítulos de 50 minutos de duración, dos cales se proxectará en Ribeira o primeiro episodio nun evento ao que está confirmada a participación do alcalde de Ribeira, Manuel Ruiz, e do conselleiro de Cultura da Xunta, Román Rodríguez.

Cómpre recordar que parte das escenas foron rodadas en diversas localizacións do municipio (como os portos de Aguiño, Palmeira e Santa Uxía) en xullo e agosto do ano pasado.