A Consellería do Mar, a través de Portos de Galicia, fixo balance do investimento a prol da mellora dos peiraos flotantes de Outes e Noia. Segundo fixo saber, véñense de destinar 750.000 euros nas actuacións de mellora integral nas estruturas de Testal, no municipio de Noia, e O Freixo, no de Outes. Ambas actuacións forman parte dunha liña de traballo estratéxica do ente público para a renovación dos equipamentos aboiantes e de atracada co obxecto de mellorar as condicións de traballo e a operatividade da frota.
No caso das obras do Testal, iniciadas en maio do ano pasado, os traballos atópanse xa rematados. A Xunta de Galicia destinou a esta actuación, dirixida integramente ao sector profesional, 350.000 euros. As obras beneficiarán ás máis de 260 embarcacións pesqueiras que utilizan estas instalacións.
Os traballos consistiron na renovación integral do pavimento dos pantaláns, substituíndo o anterior por madeira tecnolóxica, así como a habilitación dos servizos básicos de alumeado e subministración de auga e o repintado dos pilotes. Ademais melloráronse as condicións de seguridade das instalacións mediante a posta en funcionamento dun sistema de control de acceso aos peiraos flotantes a través do teléfono móbil.
Polo que respecta ás obras de mellora integral das instalacións flotantes do peirao do Freixo, que se atopan en execución, consisten na renovación integral dos pantaláns que dan servizo a máis de 350 embarcacións. Neles procederase á renovación dos pavimentos con madeira tecnolóxica. Ademais, mellorarase a rede de subministro de auga e electricidade, dotaranse de alumeado e instalarase un sistema de apertura de portas dos peiraos flotantes a través do teléfono móbil.
Os traballos completaranse coa colocación de escadas abatíbeis para o acceso aos pantaláns desde o mar, o balizamento dos extremos dos peiraos e o saneado de pilotes e limpeza de flotadores, entre outras reparacións puntuais. Finalmente, Portos de Galicia anunciou que instalará un elemento de separación para impedir o paso de vehículos á pasarela de madeira.
