O Partido Barbanza Independente (PBBI), a través do seu concelleiro e voceiro Vicente Mariño, presentou para ser debatida en pleno unha moción relativa á problemática suscitada na rúa Castelao, na parroquia de Aguiño, polos cambios de dirección de tráfico dos que vai ser obxecto. O PBBI critican neste punto o que consideran “unha imposición” do Concello, ante a cal, din, non só mostran o seu rexeitamento os veciños da devandita rúa, “senón tamén o resto dos residentes de Aguiño en xeral, e mesmo os veciños doutras localizacións próximas como A Graña, Carreira, Castiñeiras e Ribeira, que se achegaron ao PBBI para unirse neste rexeitamento”, sinalan os membros da agrupación.
O partido di terse xuntado coa cidadanía para recoller o seu malestar ante a implantación do sentido único no devandito viario, se ben “están a favor doutras melloras en materia de accesibilidade en beirarrúas, control de velocidade e colocación de alcorques”. Tamén trasladaron ao PBBI unha petición concreta para instar ao Concello a colocar semáforos na intersección coas rúas Listres (estrada de Castiñeiras) e Vionta. De igual modo, o PBBI reflicte o rexeitamento dos veciños ao trazado do carril-bici polo treito da rúa Castelao, onde interferiría polo ancho de vía, propondo como alternativa un trazado paralelo ou próximo á pasarela de madeira do paseo marítimo.
Por todo o devandito, o PBBI pide o seguinte:
1- “Rexeitamento do pleno da Corporación municipal á implantación do sentido único de circulación na rúa Castelao, Aguiño, tal e como solicitan os veciños”.
2- “Trasladar o trazado do carril-bici da rúa Castelao á zona por onde actualmente discorre a pasarela de madeira do paseo marítimo, nos tramos afectados, por non ser posible polo ancho de vía para manter as dúas direccións, afastando desta maneira ás bicicletas dos vehículos”.
3- “Instalación de semáforos na intersección coa rúa Listres -estrada de Castiñeiras- e a rúa Vionta”.
