O primeiro andar do Mercado Municipal de Ribeira vai albergar o venres 4 e sábado 5 de marzo un Curso de Estampaxe de papel con Selos Artesanais.
A través desta acción, que estará impartida por Sandra Betanzos, do obradoiro Amorote Printing, adquiriranse coñecementos sobre esta técnica milenaria e artesanal, onde se estampará un caderno de color kraft con formas de animais, flores e debuxos xeométricos.
Trátase dunha acción gratuíta e aberta a familias que terá lugar o venres de 18 a 21 horas e o sábado de 10 a 14 e de 18 a 21 horas.
O curso está patrocinado pola Fundación Pública Artesanía de Galicia da Xunta.
