As deputadas do BNG Carme González e Rosana Pérez achegáronse esta semana a Noia para manter unha reunión co presidente de Noia Histórica, José Manuel Martínez Godoy, e a xerente da Asociación, Belén Arroniz. Na sesión estableceron vías de traballo conxunto e coincidiron na necesidade de seguir transformando tecnoloxicamente o comercio local na procura dunha meirande competitividade.
Na xuntanza, a responsábel da área de comercio do BNG no Parlamento galego, Carme González, puxo o foco na diminución do 50% do orzamento da Dirección xeral de comercio da Xunta, que pasou de 35M€ en 2009 a 18M€ en 2022, e sinalou que supón “unha proba da pouca importancia que o Executivo galego lle dá ao desenvolvemento do pequeno comercio”.
Noia Histórica e BNG coincidiron nos “prexuízos para o sector” derivados da demora á hora de publicar a orde e resolver as axudas aos Centros Comerciais Abertos (CCA) e Prazas de Abastos por parte da Administración da Xunta, así como “na importancia de que estas axudas saían a comezos de ano para que as asociacións podan planificar a súa actividade”.
Outra das cuestións que destacou González foi a aposta do Bloque por loitar contra a liberalización das rebaixas, que “tanto dano fai á competitividade dos comercios de proximidade”, e adiantou que levarán iniciativas ao Parlamento e o Congreso “para que a administración galega poda ter competencias para regular esta materia”.
No plano local, Godoy lembrou a importancia que supón a apertura da plataforma de comercio electrónico Vai de Tendas ao conxunto do comercios do municipio, estean ou non asociados a Noia Histórica, e anunciou que os vindeiros 15 e 16 de febreiro celebraranse as xornadas de formación en merdacotecnia (marketing) dixital co gallo de “instruír aos establecementos que se adhiran á plataforma”, e informou de que ata esa data estará aberto o prazo de inscrición.
Godoy quixo agradecer “o importante apoio e traballo que o BNG fixo para que se puidera dar este paso”.
O portavoz municipal do BNG, Ricardo Suárez, tamén destacou a importancia desta oportunidade para o sector comercial noiés de avanzar no relevante eido da dixitalización. Suárez afirmou que “o apoio por parte da Administración local á iniciativa está sendo moi deficiente” e que o Concello “debe difundir e acompañar estes avances en dixitalización”.
