O punto álxido destas festas en Lousame será o Festival de Entroido que se celebra o sábado 26 de febreiro. Será, segundo informa o Concello, no Polidepotivo Pilar Barreiro Senra. Haberá obradoiros, xogos e inchábeis, así como degustación de orellas, filloas e chocolate con churros.
O Concello engade que “coma nos últimos anos, non haberá concurso de disfraces”. A participación na cita festeira será de balde, pero é necesario inscribirse en bandoticket. Haberá dúas quendas para evitar que se xunte demasiada xente no polideportivo: 16:30 a 18:00 e 18:30 a 20:00 horas (con media hora para desinfectar xogos e repoñer material novo para os obradoiros).
“Optamos por un sistema de quendas como unha medida extraordinaria de prevención, ao ter lugar nun recinto pechado. Queremos evitar no posible as aglomeracións e que todas as persoas que asistan desfruten da festa con total seguridade”, sinalou a concelleira de Cultura Silvia Agrafojo, quen animou á veciñanza a participar do festival.
