Arrincan os traballos para pavimentar dous camiños en Oleiros: en Sacortes e a carón do cemiterio

O Concello de Ribeira informou do inicio dos traballos para pavimentar dous camiños situados en Oleiros: o do lugar de Sancortes e o que desemboca no cemiterio desta parroquia. Segundo fontes do Consistorio, ambos camiños posúen un firme de aglomerado asfáltico bastante deteriorado nalgúns treitos, polo que se considerou a conveniencia de executar esta obra coa fin de mellorar os seus firmes cun novo pavimentado.

Así, no que se refire ao camiño de Sancortes, aplicarase unha capa de mestura bituminosa en quente de 5 centímetros na calzada (980 metros cadrados), previa limpeza das marxes, acondicionamento da superficie e extensión de saburra artificial nos sobreanchos.

Polo que respecta ao camiño do cemiterio, a mestura de bituminosa en quente a aplicar é de 6 centímetros de espesor nunha superficie de 2.147 metros cadrados. Ao igual que na outra vía, con antelación limparanse as marxes, adecuarase a superficie e botarase saburra artificial nos sobreanchos.

A actuación está sendo desenvolvida por Nemesio Ordóñez, S.A. e supón un investimento de 31.619 euros, IVE incluído, financiados no marco do POS+ 2018.