Este mércores 16 de febreiro as instalacións de Ambar en Frións (Ribeira) recibiron a visita de Flavia González, representante da Multinacional Clece e técnica de Selección de Persoal de Galicia e Asturias na dita compañía. Durante a xornada, compartiu a visión da empresa Clece e aportou consellos sobre os procesos de selección ás persoas usuarias dos proxectos de emprego que está desenvolvendo a asociación de persoas con diversidades funcionais e cognitivas. Acompañando a Flavia acudiu á sede de Ambar Sara Costa, técnica do departamento de Selección de Persoal. Estiveron representando á asociación Milagros Rey, presidenta, Alicia Romero, coordinadora da área administrativa, Daniel Tojo, orientador laboral, e Ángeles Sampedro, técnica de emprego e responsábel do proxecto.
Asistiron as 10 persoas inscritas na formación sobre actividades auxiliares na industria alimentaria que se está impartindo neste momento na entidade.
Esta formación é posíbel grazas ao financiamento da Fundación ONCE, no programa Uno a Uno do POEJ convocatoria 2021-2022 e o Fondo Social Europeo. E ten como obxectivo promover a sustentabilidade e a calidade no emprego, favorecer a mobilidade laboral, así como reforzar a empregabilidade e as competencias profesionais das persoas novas e non integradas nos sistemas de educación ou formación.
Flavia destacou a importancia “dunha actitude positiva e resiliente no proceso de busca de emprego”, poñendo o foco tamén na relevancia da formación continúa. E sinalou o compromiso de Clece cos procesos inclusivos e cos distintos movementos asociativos.
Con esta xornada, Ambar deu comezou a un ciclo de conferencias con distintas empresas, que aportarán a súa experiencia e coñecementos ás persoas con diversidade funcional vinculadas ao proxecto de emprego de Ambar coa Fundación ONCE.
