A Deputación da Coruña presentou este 8 de febreiro o seu programa piloto para paliar a soidade non desexada nas persoas maiores, unha iniciativa a desenvolver nos municipios de Muros, Vimianzo e Ortigueira.
Ana Lamas, deputada de Benestar Social, expuxo os puntos fundamentais deste plan concibido para concellos de menos de 20.000 habitantes da provincia, enmarcado no Marco Estratéxico do Plan de Acción de Servizos Sociais provincial.
O obxectivo, sinalou, é “dotar á Deputación dun modelo de intervención contra a soidade non desexada no marco da Rede de Concellos para o Benestar a través da colaboración cos actores locais e da xeración de espazos de encontro e reflexión conxunta”.
“Se algo nos trouxo a pandemia foi precisamente a importancia de que existan este tipo de servizos. Para nós é estratéxico e imos un paso máis aló, o coidado dos nosos maiores está no punto número 1 da política de acción desde a área de Benestar Social”, destacou.