O Colexio Pé do Corniño (Carreira) acolleu este venres a visita da concelleira de Educación de Ribeira, Juana Brión, que visitou o centro educativo con motivo das obras que está desenvolver a brigada municipal de obras para resituar e erixir unha nova biblioteca.
A visita estivo propiciada pola visita de Paz Fernández, coordinadora da Asesoría de Bibliotecas Escolares, interesada por este proxecto de cara a prestar o asesoramento da entidade. A este respecto, o Concello lembra que a Asesoría de Bibliotecas Escolares é un equipo integrado na Dirección Xeral de Centros e Recursos Humanos da Consellería de Cultura, Educación e Universidade que se encarga de coordinar as actuacións en materia de bibliotecas escolares e o fomento da lectura dentro do Plan LÍA de Bibliotecas Escolares.
A reestruturación da biblioteca nun andar superior pretende mellorar as súas prestacións e permitir a celebración de novas actividades como é o caso do programa Radio na Biblio.
