A Xunta fixo pública a resolución definitiva dos 873 aspirantes admitidos ao proceso selectivo para optar a 70 prazas de Policía Local a través das oposicións centralizadas pola Xunta a través da Academia Galega de Seguridade Pública (AGASP). A resolución tamén recolle os aspirantes que están exentos de realizar a proba de coñecementos de lingua galega. Entre os concellos onde se cubrirán prazas atópanse Ribeira e Porto do Son.
O proceso comezará este 20 de xaneiro no recinto feiral de Silleda cos dous primeiros exercicios. A proba de avaliación de coñecementos constará dunha enquisa de 100 preguntas tipo test do temario proposto na convocatoria. Ademais, as 169 persoas convocadas á proba de coñecementos de lingua galega realizarán este segundo exercicio ao remate do primeiro.
O terceiro exercicio do proceso selectivo correspondente ás probas físicas está previsto para o mes de febreiro e levarase a cabo no Centro Galego de Tecnificación Deportiva de Pontevedra.
Unha vez rematado o proceso, prevese o inicio nas instalacións da AGASP do curso de formación teórico-práctico obrigatorio que deberán superar os aspirantes que aprobaron as probas anteriores antes de poder elixir destino e ser nomeados funcionarios en prácticas polos concellos.
A través desta vía cubriranse un total de 70 prazas comunicadas por 29 entidades locais: A Coruña, A Pobra de Trives, Betanzos, Bueu, Carballiño, Fene, Ferrol, Foz, Lugo, Narón, Nigrán, O Barco de Valdeorras, O Grove, Ordes, O Rosal, Ortigueira, Ponteareas, Pontevedra, Porto do Son, Redondela, Ribeira, Salceda de Caselas, Santiago de Compostela, Sanxenxo, Tomiño, Tui, Valdoviño, Vilagarcía de Arousa e Viveiro.
