O BNG de Noia esixe solucións para mellorar o sinal de TV en varios núcleos do concello

O grupo do BNG de Noia vén de lanzar unha serie de preguntas ao Goberno local a respecto dos problemas no sinal de televisión que está a sufrir a veciñanza de varios núcleos de poboación do termo municipal, “uns problemas que no canto de mellorar están a ir a peor”, indican dende a formación nacionalista, que foi alertada por veciños de Sobreviñas e Ponte de San Francisco de “que nos últimos días non se poden visualizar diversas canles, incluídas algunhas das de maior audiencia”.

Segundo engaden, as máis recentes preguntas sobre as medidas a tomar polo Concello para emendar estes problemas foron emitidas nos pasados meses de outubro e novembro, mais sinalan que “a última delas aínda non foi contestada polo Goberno local”. Nelas, a agrupación informa de que se ben os problemas de recepción son máis intensos nos lugares de Sobreviñas e Ponte de San Francisco, tamén afectan a outras localizacións do municipio.

Segundo o BNG de Noia, “a primeira das problemáticas deriva dos recorrentes problemas técnicos que o repetidor da sinal de televisión sofre, e que fan que de xeito repetido aparezan problemas puntuais na recepción de determinadas canles televisivas”. A isto engádense repetidos problemas en momentos concretos e máis a localización do repetidor, situado no núcleo de Sueiro, que provoca que se xeren “zonas de sombra” con respecto a algún dos lugares. “Debido a isto, unha importante porcentaxe dos fogares destes núcleos reciben un sinal de televisión deficiente en todo momento e non poden visualizar moitas canles entre as que se inclúen algunhas das de máxima audiencia”, sinalan os representantes do BNG.

Dende a formación nacionalista denuncian “o paso dos meses sen que o Goberno local atenda as súas continúas peticións para dar solución a estas problemáticas” e veñen de anunciar novas iniciativas no pleno de xaneiro para insistir na necesidade de atender estas demandas cidadás.