O Concello de Ribeira informou do inicio dos traballos para a instalación de paneis fotovoltaicos na depuradora de Couso. Trátase, sinala, “dunha das actuacións derivadas da adxudicación dos servizos de explotación e mantemento das dúas EDAR existentes no noso municipio á empresa FACSA”.
Así, nestes momentos estanse a desenvolver os labores de acondicionamento do terreo onde se van situar os paneis: un total de 228, con potencia pico de 102 kwp. A instalación dos mesmos, explicaron fontes do Concello, está previsto que comece o vindeiro martes.
Mediante esta iniciativa búscase optimización enerxética da planta, reducindo o seu consumo eléctrico como consecuencia da produción de enerxía renovable mediante instalación fotovoltaica.
Ademais, este aforro enerxético tradúcese na redución de emisións de gases de efecto invernadoiro estimadas en 22,99 toneladas métricas de CO2 anuais non emitidas á atmosfera, coa conseguinte minoración da pegada de carbono.
Vehículos eco
Co mesmo obxectivo de reducir o impacto medioambiental das estacións depuradoras de Corrubedo e Couso, o servizo de explotación e mantemento vai contar tamén con tres novos furgonetas e un turismo tipo ECO. Actualmente están en proceso de rotulado.
