Catro tremores en apenas dúas horas fronte á costa do Barbanza

Epicentros dos catro tremores rexistrados á primeira hora da tarde

O Instituto Xeográfico Nacional rexistrou ás 15.45 horas deste xoves 27 de xaneiro un terremoto a escasa distancia da comarca do Barbanza, aproximadamente a uns trinta quilómetros de distancia mar adentro e cunha magnitude de 4,6.

O movemento sísmico foi detectado pola veciñanza en toda a nosa comarca e noutras contornas próximas, por exemplo O Salnés, Pontevedra e a área de Vigo. Mesmo se deixou notar en Santiago de Compostela, tal e como veñen de confirmar a este medio numerosas persoas residentes na capital de Galicia e a súa comarca. Segundo datos do IGN, o terremoto foi rexistrado a cero quilómetros de profundidade.

O movemento en cuestión foi precedido doutros de menor intensidade de 3,7 ás 13:57, 2,5 ás 14:58 e 1,9 ás 14:55, na escala de Ritcher, aproximadamente unha hora antes.

Porén, os datos do IGN confirman que estes dous tremores forman parte dunha longa serie de movementos sísmicos, moitos deles de escasa entidade, que levan varias xornadas sacudindo a xeografía galega, non só as augas do Atlántico, senón tamén Mondariz ou A Cañiza.