O Concello de Noia informou de que este 26 de xaneiro remataron finalmente as actuacións para restablecer o alumeado completo da ponte sobre a ría, que se atopaba danada na plataforma, fundida parcialmente.
Dende o Consistorio engaden que o servizo de mantemento estivo realizando os traballos de reparación da mesma.
O alumeado actual foi prendido oficialmente no Nadal de 2020, complementando e enriquecendo unha iluminación previa, máis sinxela e desprovista de cores, que coincidiu coa apertura da ponte ao tráfico, no verán de 2014. O obxectivo da nova instalación era achegar un importante elemento de vistosidade á construción durante a noite, ademais de mellorar a visibilidade e a seguridade dos condutores. Foi realizada pola empresa Taboada y Ramos S.L. e contou cun investimento de máis de 325.000 euros.
