O Concello de Ribeira vai achegar este mes de xaneiro dous cursos de balde para facilitar o día a día da veciñanza por medio dos seus dispositivos. En concerto, a aula CeMIT local vai dar cabida do 24 ao 27 de xaneiro á celebración dunha actividade formativa sobre como realizar trámites en liña coas administracións (Administración Electrónica) e outra sobre como sacar o máximo proveito dos móbiles con sistema Android.
Un dos cursos versará sobre Sede Electrónica, con incidencia no certificado dixital (como solicitalo, instalalo, facer unha proba de seguridade, probar en distintas situacións, etc.) e no DNI electrónico (como activalo, cambiar a clave…). Desenvolverase de 10 a 11.30 horas.
O segundo, que se impartirá de 12 a 13.30 horas, estará dedicado ao uso básico de móbiles con Android: axustes básicos, teléfonos e contractos, Whatsapp, cámara/galería de imaxes, instalación e desinstalación de aplicacións móbiles, etc.
Tanto nun como no outro as persoas interesadas pódense inscribir na propia aula CeMIT (situada na rúa 1 Cubeliños / teléfono: 981 876 043) ou ben de xeito telemático a través da ligazón da aula.
