Portos dá luz verde á localización do Centro de Deportes Náuticos de Aguiño

Portos de Galicia, dependente da Consellería do Mar, vén de dar a súa autorización ao emprazamento do Centro de Deportes Náuticos no porto de Aguiño. Así vén de coñecelo o alcalde Manuel Ruiz logo de que o Concello solicitase unha declaración de interese para poder utilizar unha parcela no porto cunha superficie duns 1.100 metros cadrados para o devandito obxectivo.

Recibido o visto bo da entidade portuaria, darase a coñecer as posibilidades construtivas que permite a parcela tanto aos grupos políticos e á Confraría de Aguiño como ao propio Club de Remo Náutico de Ribeira.

O alcalde expresou a súa satisfacción “por poder contar por fin cun lugar definitivo para levantar estas instalacións, que se corresponde ademais co que era o lugar predilecto á hora de acoller este centro ante o esforzo que está a realizar o pobo de Aguiño e a súa confraría para atender aos deportistas do remo que teñen alí dende fai anos a súa sede”.