Este domingo 26 de decembro pola tarde celebrouse na provincia da Coruña o prendido oficial do segundo programa Acende o Xacobeo, que inclúe o alumeado de 52 monumentos singulares galegos, 18 pola provincia. Na listaxe de edificios sobranceiros, que ficarán acesos até o 7 de xaneiro, inclúese a Igrexa de Santa Columba de Rianxo, marcando o camiño marítimo-terrestre de Arousa Norte, A Orixe. No acto de prendido deste domingo, celebrado na Torre de Hércules da Coruña, participou o delegado da Xunta na Coruña, Gonzalo Trenor.
Co gallo do comezo do segundo Ano Santo e recollendo o éxito da primeira iniciativa Acende o Xacobeo, arrincou unha nova edición desta proposta, que ilumina medio cento de edificios significativos de toda Galicia distribuídos polos dez itinerarios xacobeos.
A iluminación na comunidade galega ten lugar durante as fins de semana en cor azul e coa frecha amarela e o logo do Xacobeo 21-22 nun total de 52 edificios das catro provincias. Na provincia da Coruña concretamente iluminaranse 18 edificios nas cinco comarcas.
Concurso fotográfico
Do mesmo xeito en que se fixo o ano pasado, a segunda edición do Acende o Xacobeo tamén terá o seu concurso fotográfico. Co acendido ábrese nas redes sociais un concurso fotográfico para animar ao público xeral a compartir esta iniciativa. Así, as persoas participantes terán que publicar unha fotografía na que se vexan persoas xunto a un dos monumentos iluminados baixo os cancelos #AcendeOXacobeo ou #EnciendeElXacobeo e etiquetando as redes sociais do Camiño de Santiago. As fotografías poderán publicarse nas redes sociais de Facebook, Twitter ou Instagram do Camiño de Santiago (@camino_xacobeo).
O concurso estará aberto ata o remate da iluminación e as tres mellores fotografías recibirán un premio consistente nunha estadía para dúas persoas nun fin de semana nun hotel-balneario de Galicia en réxime de pensión completa.
-Torre de Hércules (A Coruña
-Edificio Afundación (A Coruña)
-Teatro Jofre (Ferrol)
-Abanca Ferrol (Ferrol)
-Faro de Fisterra (Fisterra)
-Capela de San Roque (Melide)
-Igrexa de Santiago (Betanzos)
-Igrexa de Santiago do Burgo (Culleredo)
-Casa do Concello (Fene)
-Santa María de Ordes (Ordes)
-Torreón dos Andrade (Pontedeume)
-Capela de Santa María Madalena (Ames)
-Igrexa de Santiago Apóstolo (Padrón)
-Igrexa de Santa Columba (Rianxo)
-San Caetano (Santiago)
-San Bieito (Santiago)
-Cidade da Cultura (Santiago)
-Catedral. Torre da Berenguela (Santiago).
