Unha exposición formada por 26 gravados realizados nos obradoiros de gravado guiados polos profesores José Fuentes e Antonio Navarro, ambos da Universidade de Salamanca, exhíbense dende a noite de onte no Museo do Gravado de Artes.
O acto inaugural contou coa participación dos dous docentes, ademais do presidente e o vicepresidente da Fundación Museo de Artes (Manuel Ruiz e Javier Expósito), a concelleira de Cultura de Ribeira María Sampedro, e o director do museo, Pastor Rodríguez.
A exposición titúlase “Rosalía de Castro – Álvaro Paradela Gravado á Pluma”. Trátase dunha mostra artístico-literaria inspirada na obra Follas novas, da poetisa de Padrón, e no conto Rosa de Laíño, do escritor coruñés Álvaro Paradela.
Acompaña a exposición a edición do libro-catálogo que foi repartida entre os numerosos asistentes ao acto de apertura, con presenza de artistas como Manuel Ayaso, Antonio Pérez ou Alfonso Costa, entre outros.
