Este venres 17 de decembro vaise pre-estrear en Rianxo a curtametraxe Devoradora de nenos, do director rianxeiro Fran X. Rodríguez. A cita será ás 21.00 horas no Auditorio de Rianxo.
A curta Devoradora de nenos é unha adaptación audiovisual dun relato do burelense Martiño Vázquez, que tamén é o produtor executivo da cinta. O equipo da curta, conformado tamén por Marcos Nine, ao guión, e Fran X. Rodríguez na dirección, é o mesmo cadro artístico responsábel doutra curta de éxito: Beautiful Boy. A nova produción está protagonizada polo actor Santi Prego, que xa repetía na obra previa e que dá vida agora a un home que de neno foi vítima dun dramático suceso que truncou para sempre o seu soño de ser astronauta e, que, ademais, desencadeou que fose vítima de acoso por parte dos seus compañeiros. Trátase pois dunha cita de ciencia ficción que a maiores pon o foco nunha problemática moi presente nas nosas vidas ao verse agravada pola entrada en xogo das novas tecnoloxías: a problemática do bullying. Devoradora de nenos xa conta cun primeiro premio: o de mellor guión no festival FKM da Coruña.
A reserva de localidades realizase na web do Concello de Rianxo. Será efectiva cando se confirme dende o Auditorio Municipal (a confirmación non é inmediata). De quedar localidades dispoñibles, poderán solicitarse na billeteira do auditorio dende media hora do evento.
