O Goberno de España acaba de acordar coas comunidades autónomas o investimento de 615 millóns de euros dos fondos europeos en 169 proxectos e destinos turísticos concretos, máis dunha decena deles situados en Galicia, dedicados ao programa de Plans de Sustentabilidade Turística en Destinos.
Unha comunidade, a galega, na que se establecen tres Actuacións de Cohesión en Destino ( ACD) promovidas pola Xunta, cun investimento de 11,3 millóns de euros, xunto con 10 Plans de Sustentabilidade Turística en Destino ( PSTD) impulsados por entidades locais que recibirán 18 millóns de euros.
Entre estes últimos inclúense o deseño e a execución do Museo do Mar de Ribeira e a implantación dunha plataforma de destino intelixente que xestiona o concello. Ademais de actuacións en en distintos municipios da Ría de Muros-Noia mediante a Asociación Rural de Desenvolvemento.
A proposta Ribeira pretende a rexeneración e a posta en valor da contorna litoral do municipio abrindo Ribeira ao mar, coa creación de senllas peonís e ciclistas, ademais de apostar pola recuperación do patrimonio etnográfico e a creación de produtos turísticos que destaquen os seus atractivos.
Xunto á creación do Museo do Mar, prevé a posta en marcha dun corredor ecolóxico cicloturístico no litoral entre Santa Uxía de Ribeira e Ameixida, pasando por Castiñeiras e a Fonte Seca, a humanización de espazos de gran potencial turístico, como os exteriores do Faro de Corrubedo, a colocación estratéxica dun miradoiro e punto de interpretación da paisaxe en Punta Castro ou a reconversión da zona de San Roque nun parque periurbano.
Todo iso no marco do programa Ribeira, destino intelixente que prevé a creación dunha oficina de turismo virtual con alertas, apps específicas e ferramentas dixitais. O proxecto complétase cun plan de sinalización integral dos recursos turísticos nesta zona da Ría de Arousa.
Pola súa banda a veciña Ría de Muros-Noia verase beneficiada dos fondos europeos extraordinarios co Proxecto de Xeodestino que impulsa a Asociación Rural de Desenvolvemento que conforman os concellos de Noia, Lousame, Porto do Son, Outes e Muros.
O Goberno galego priorizou na convocatoria deste ano potenciar o valor da costa como reclamo turístico a través de actuacións de conservación dos seus recursos e a mellora de infraestruturas da súa contorna e que permitirá, no caso do Xeodestino Ría de Muros-Noia, un mellor posicionamento e promoción deste destino turístico, ademais dunha mellora na sinalización dos roteiros e itinerarios a pé e BTT por todo o seu litoral, base da proposta do Camiño Portus Apostoli a Santiago de Compostela.
