A Concellaría da Promoción Económica, da cal é titular Charo Varela (Nós Pobra), vén de configurar unha serie de actividades coas que desfrutar do Nadal na localidade, segundo anunciaron ela mesma e o alcalde da localidade, Xosé Lois Piñeiro esta mañá.
Trátase dunha variada programación que pretende estar presente en tódolos recunchos do concello e apta para tódalas persoas, facendo especial fincapé nos máis pequenos. Así pois, por primeira vez vai haber un Nadal Móbil que pasará por tódalas parroquias; en total 7 puntos nos que haberá actividades, obradoiros do Nadal, chocolatada e máis sorpresas. En palabras de Charo Varela, “esta actividade preséntase como un punto de encontro para toda a veciñanza, pois estas datas caracterízanse polos momentos de compartir entre as persoas achegadas”. Os lugares que percorrerá o Nadal Móbil son: O Camiño Ancho, Santo Isidro, O Campiño, Santa Cruz, O Maño, A Angustia e A Ribeiriña.
Ademais, este ano de novo se vai achegar Papá Noel ás escolas da Pobra, visitando nos días 17 e 20 de decembro todos os colexios de infantil e primaria do concello.
Outra das actividades comentadas foi o Mercado do Nadal, situado na céntrica praza do Cantón da Leña, que se porá en marcha mañá 8 de decembro e que arrancará cun showcooking a cargo do cociñeiro pobrense Xaime Chouza, que arredor das 18:30 h estará cociñando galletiñas de xenxibre e unha chocolatada para toda a veciñanza. Este mercado, que estará aberto nas fins de semana ata o día 9 de xaneiro, contará cunha serie de actividades de dinamización como xogos tradicionais (os días 11 e 18 de decembro), un novo showcooking a cargo de Xaime Chouza (o día 12 e decembro) música e baile tradicional a cargo das asociacións Arrancadeira, Xiada e Eiradela (os días 19 e 26 de decembro e 2 de xaneiro respectivamente).
Pola súa banda, o alcalde, Xosé Lois Piñeiro, destacou o esforzo que supón leva-lo Nadal a tódolos recunchos do concello e que forma parte da política de descentralización das actividades municipais que se está a levar a cabo dende o goberno. Por último, tamén enxalzou a importancia da participación do tecido asociativo como elemento dinamizador do Mercado do Nadal e animou a tódalas persoas a participaren nestas actividades, facendo honra ao espírito que preside estas festas.
