A OPP83, Sociedade Cooperativa Galega do Mar Santa Eugenia, organiza este 13 de decembro unha xornada de reflexión dirixida a pór de relevo diferentes medidas e metodoloxías que contribúan a mellorar as condicións laborais dos traballadores e traballadoras do mar. A primeira edición das Xornadas sobre Seguridade e Prevención a Bordo celebrarase no Centro Cultural Lustres Rivas a partir das 9.30 horas. Contarase coa presenza do alcalde, Manuel Ruiz Rivas, e da xerente da OPP83, María José Casais.
As xornadas desenvolveranse ata ás 14:00. A apertura correrá a cargo, precisamente, de María José Casais e Manuel Ruiz Rivas, e o programa proseguirá cunha mesa de debate na que van participar Francisco Alonso Lorenzo, conselleiro técnico de Seguridade e Medio Ambiente do Ministerio de Fomento en Galicia, e Bernardo Rodríguez, capitán da Marina Mercante. Logo da pausa para o café ao mediodía, as actividades proseguirán cun relatorio sobre os aspectos legais da prevención de riscos a cargo de Beatriz Goicoechea, de Amya Abogados (Vigo), e unha charla sobre a incidencia da navegabilidade nos contratos de seguro que será impartida por Alberto Penelas, especialista en dereito marítimo.
