Coa presencia do Deputado Provincial, Xosé Luís Penas Corral delegado de Contratación, Patrimonio Provincial e Equipamento en representación do organismo que financiou a actuación de recuperación e sinalización da estación arqueolóxica de Bouza Badín e da impresión do libro, de Pablo Sanmartín do Colectivo a A Rula que se encargou da maquetación, fotogrametría e calcos dixitais co que se fixo a publicación, a arqueóloga directora da intervención Nerea Vilariño, o alcalde de Dodro Xabier Castro e o concelleiro de Cultura e Patrimonio Xoán Xosé Vicente Franco que fixo a presentación, deuse a coñecer a publicación ante numerosos veciños e persoas interesadas no patrimonio rupestre de Dodro.
Con esta publicación O Concello de Dodro, a través da Concellería de Cultura e Patrimonio, pretende dar visibilidade ao extraordinario traballo do “Colectivo A Rula” que estudaron durante varios días os catorce paneis que forman esta estación arqueolóxica moito antes de que a Deputación de A Coruña decidira o estudo, posta en valor e sinalización dos mesmos.
Pablo Sanmartín, do Colectivo a Rula, dixo que “este libro pode ser unha moi boa guía para a visita aos petróglifos porque se explica con moita precisión cada panel e que fai mais sinxela a interpretación dos motivos rupestres e que ten que ser unha publicación que se difunda entre as escolas do concello para que os nenos descubran a marabillosa estación de Bouza Badín.”
O Deputado Provincial, Xosé Luís Penas Corral pola súa parte dixo que a deputación da Coruña está disposta a seguir apoiando ó Concello de Dodro na súa teima pola difusión e conservación do patrimonio ante a nula colaboración de outras entidades como a Xunta de Galicia.
Nerea Vilariño de “Árbore Arqueoloxía” fixo unha breve exposición dos traballos feitos recentemente na estación arqueolóxica destacando a limpeza con métodos manuais e a sinalización que se vai realizar en días vindeiros.
Pola súa parte o concelleiro Xoán Xosé Vicente Franco afirmou que dende o goberno de Dodro “cremos, e estamos convencidos, que a conservación e divulgación do noso patrimonio cultural é unha maneira de supervivencia da nosa identidade como pobo e por iso mesmo queremos que as xeracións vindeiras non esquezan o seu rico patrimonio cultural e en concreto este lugar, polo que este libriño servirá para esta necesidade entre as escolas, o CRA, o CPI, a biblioteca de Dodro e o resto das entidades públicas e privadas de Galicia que sexa necesario”.
Pechou a presentación o alcalde de Dodro Xabier Castro remarcando o compromiso político deste goberno do concello de seguir apoiando o patrimonio de Dodro porque é un valor que nos pon no mapa e axuda a un maior coñecemento do noso pobo.
Despois deste acto fíxose unha visita aos petróglifos onde se puideron ver os traballos realizados por parte de Árbore Arqueoloxía.
