Portos remata as obras de mellora da terraza exterior da Lonxa de Ribeira

A Consellería do Mar, a través de Portos de Galicia, vén de informar do remate das obras de reforzo do pavimento da terraza exterior da nova Lonxa de Ribeira. Os traballos supoñen unha mellora do estado do inmóbel, que está aberto ao público en xeral.
O organismo dependente da Xunta investiu 50.000 euros nesta actuación, que, como dixemos, atópase xa rematada. Os traballos, segundo explica a Consellería, “supuxeron a substitución do anterior pavimento desta zona do edificio, que presentaba deficiencias derivadas do desgaste polas inclemencias meteorolóxicas e a proximidade da auga salgada”.
Portos de Galicia instalou no chan da terraza da lonxa madeira tecnolóxica en substitución do material existente ata agora. “Trátase”, explica a entidade, “dunha opción ecolóxica, reforzada e máis duradeira, especialmente nunha contorna marítima como é o caso”.