Este venres 19 de novembro o Auditorio de Rianxo vai dar acollida á representación de Unha primavera para Aldara a cargo do Grupo de Teatro Airiños. Será a partir das 19.00 horas.
A obra teatral, que ten unha duración de 90 minutos e non está recomendada para menores de 12 anos, lévanos da man á Galicia do século XV, durante a Revolta Irmandiña, á vida dun convento rexido pola abadesa Aldara Eáns, que discorre con tranquilidade até que chega ás súas portas, en primavera, un guerreiro irmandiño ferido, don Nuno, pedindo acubillo. A función está baseada no texto da escritora Teresa Moure, unha das escritoras máis sobranceiras das letras galegas do noso tempo, autora de clásicos actuais da literatura galega como Herba Moura ou Ostrácia (a vida da amante de Lenin, Inessa Armand) por poñer só dous exemplos.
A obra obtivo o Premio de Teatro Rafael Dieste 2007, ademais dos premios da Asociación de Escritores en lingua Galega (teatro) 2008 e sete galardóns María Casares pola montaxe de Teatro do Atlántico, entre eles ao Mellor Texto Orixinal 2009.
A entrada ten un custe de 3 € e a reserva realízase no correo electrónico entradas.arinhos@gmail.com.
