A compañía Redrum Teatro elixiu Rianxo para presentar (e representar) Un home con lentes de pasta. Será o 22 de outubro, na Sala Arcos Moldes do Auditorio. Trátase dunha obra recomendada para público maior de 13 minutos. A entrada é de balde, pero cómpre facer a reserva a través da web municipal.
O argumento da obra xira arredor de Sheyla, que acaba de ser abandonada pola súa parella. Laura e Fer quérena animar para que aproveite a oportunidade e faga realidade os desexos que aparcara: escribir. Traerán a cear a Guillerme. El é o poeta capaz de namorar a calquera cuns breves versos. Pero a Guillerme non lle van satisfacer as conversas banais nin os frívolos momentos de distensión: Guillerme desexa algo máis.
Esta comedia estreada en Barcelona no 2010 recibiu o premio da crítica Serra D’or ao mellor texto teatral, o de mellor espectáculo nos premios Time Out no 2011, o premio Mi Butaquita de mellor obra no 2014 e estivo nomeada ao mellor texto catalán nos Premios Max do 2011.
O elenco está formado Guillermo Carbajo, Sheyla Fariña, Laura Míguez e Fernando González.
O texto é de Jordi Casanovas. A tradución e a dirección corren a cargo de Alex Sampayo.