O Grupo Municipal Socialista de Noia solicitou no pasado pleno ao Goberno municipal a reapertura da área recreativa do Monte do Bolo. O PSOE formalizou a petición por escrito, requirindo que “se realicen as actuacións necesarias para reabrir a área recreativa o antes posíbel”. Amais, teñen previsto preguntar cada mes polas actuacións que se levan a cabo para asegurarse de “que a petición non caia no esquecemento”.
O voceiro do Grupo Municipal do PSOE, Roberto Iglesias indicou que “tras os investimentos realizados nos últimos anos, xa con Santiago Freire de alcalde, anunciouse en varias ocasións que se realizarían as actuacións necesarias para abrir a área.”
O voceiro engadiu que os socialistas consideran que “débese reabrir o Monte do Bolo para desfrute da cidadanía”, e que “actualmente a falla de xestión por parte do Goberno municipal está a privar que os veciños fagan uso desta área, pechada xa dende hai anos”. A agrupación di non entender que “despois de recibir subvencións de Fondos europeos a través da Xunta de Galicia para mellorar os accesos, e de que se fixeran traballos por parte dos obradoiros de emprego, esta área pública leve varios anos pechados ante a desleixo do Goberno de Santiago Freire”.
