A plataforma web RibeiraStore, creada polo Concello de Ribeira para dinamizar o sector comercial do municipio no contexto de pandemia, poñendo á súa disposición un instrumento de dixitalización e ampliando mercados, vén de ser obxecto dun importante recoñecemento. Máis polo miúdo, recibiu este luns 4 de outubro unha mención especial no terceiro Concurso de Ideas Tecnolóxicas para o Comercio Minorista, COMITEC.
Ao acto, que tivo lugar en Madrid, asistiu a concelleira Ana Barreiro, quen liderou a creación e o desenvolvemento da plataforma. Foi tamén a encargada de recoller o galardón entregado pola Secretaria de Estado de Comercio, Xiana Margarida Méndez Bértolo.
Os premios COMITEC buscan incrementar a competitividade do pequeno comercio abordando o reto do cambio tecnolóxico. Trátase dunha iniciativa creada conxuntamente pola a Secretaría de Estado de Comercio (SEC) do Ministerio de Industria e a Federación Española de Municipios e Provincias (FEMP).
A plataforma Ribeirastore, que integra ós 700 comercios do concello de Ribeira, nace en xullo do 2020 no marco do Plan Reactiva Ribeira. Ten como principal obxectivo mellorar a visibilidade en buscadores e redes dos negocios locais e aumentar as vendas de produtos e servizos do termo municipal.
