O comité da planta de residuos de Lousame volve convocar folga o luns para reivindicar a súa viabilidade


A Xunta denega a autorización ambiental para construír unha nave de valorización de residuos e unha entulleira para materiais non perigosos

O comité de empresa da planta de residuos de Lousame volve convocar folga para este luns 11 de outubro para reclamar a continuidade da súa actividade e ante os avisos que poñen en dúbida a súa viabilidade.
En 2023 acábase o contrato e o persoal teme “irse á rúa”, de aí o paro, que xa se convocou a finais de agosto e tamén estivo acompañado dunha manifestación.

Neste caso, a marcha á que se sumarán os traballadores da planta de residuos de Lousame desenvolverase este domingo a partir das 12,00 horas en Noia.


A Xunta acaba de denegar a autorización ambiental integrada ao proxecto para construír unha nova planta de tratamento de residuos en Lousame. O Diario Oficial de Galicia (DOG) publica este martes o anuncio coa resolución da Dirección Xeral de Calidade Ambiental, Sostibilidade e Cambio Climático, organismo dependente da Consellería de Medio Ambiente, Territorio e Vivenda.

A denegación por parte da Xunta vén motivada pola declaración de impacto ambiental ( DIA) negativa que xa emitira en 2018 ao concluír que este proxecto, “previsiblemente, causará efectos negativos sobre o medio ambiente xa que as medidas previstas polo promotor non garanten a súa completa corrección ou compensación”.