O BNG ribeirense quere rebaixar varias taxas e impostos municipais coa finalidade de acabar cunhas “taxas e impostos abusivos” e que, segundo informa a agrupación, “sitúanse por riba da media dos concellos da contorna”. Por este motivo, os nacionalistas presentaron emendas á modificación das ordenanzas fiscais que quere aprobar o Goberno local, ao considerar que “se está castigando á veciñanza a pagar máis por decisións erradas tomadas polo Partido Popular”.
O concelleiro do BNG, Luís Pérez Barral, esgrimiu que “sabemos que hai fondos suficientes para facer rebaixas importantes pero o Goberno local prefire facer caixa cunhas taxas e impostos, claramente abusivos, que lle cobra á veciñanza neste momento de crise económica”. Barral criticou o feito de que “o Concello de Ribeira queira cobrar á veciñanza 4.650.000 euros en concepto de auga, saneamento, lixo e sumidoiros, mentres outras taxas e impostos que non lle afectan á veciñanza, se manteñen en niveis mínimos como por exemplo a que grava o uso de terreo público por parte das compañías eléctricas e telefónicas da que só se prevé ingresar 265.000 euros”.
Desde o BNG consideran que a cidadanía “non debe pagar as malas decisións adoptadas polo PP cando escolleu o actual modelo de depuración caro e ineficiente”. Así, a organización nacionalista propón reducir un 20% a taxa de saneamento e depuración por ser, nas súas palabras, “un tarifazo abusivo” e formulan incrementar a bonificación a colectivos vulnerábeis un 10%, pasando da exención do 50 ao 60% da taxa. Con respecto ao subministro de auga para consumo, avogan por crear unha bonificación dun 30% para familias numerosas e establecer dous tramos, un xeral e outro máis baixo para fomentar que aquelas persoas que reduzan o consumo de auga poidan pagar menos. “Aprobar esta medida premiaría aqueles fogares que reduzan o seu consumo de auga” asegura Pérez Barral.
Por outra banda, propoñen a rebaixa xeral do imposto de vehículos un 2% e aumentar a bonificación para vehículos eléctricos, híbridos e de baixas emisións pasando da bonificación dun 50% durante os 5 períodos impositivos seguintes ao da súa matriculación, a tela durante un período de 7 anos.
Por último os nacionalistas avogan por manter o prezo actual pola retirada de vehículos na vía pública e recriminan “que o PP queira subir un 23% esta taxa”.
