Os socialistas de Ribeira presentaron un rogo no Concello relativo ao estado no que se atopa o pavimento enlousado no porto de Aguiño, onde hai empedrados levantados que poñen en perigo a circulación dos viandantes, e tamén a do tráfico. Esta situación, sinalan, repítese na praza do Concello de Ribeira, onde tamén hai lousas desencaixadas e perdendo adherencia co morteiro de cemento, o que “ocasiona evidentes problemas tanto na circulación de automóbiles como na peonil, ao quedar levantadas sobre o nivel da rasante”, explican.
Tamén engaden que o problema de Aguiño céntrase no porto, á altura do monumento aos mariñeiros. “Alí hai lousas levantadas que están a causar tropezóns e molestias na circulación rodada, con importantes desgustos de diversa índole”, explica a agrupación, que pide que “por parte de quen corresponda se dea orde para efectuar a reparación de ditas baldosas da beirarrúa, co fin de solucionar os problemas de circulación, e lesións persoais que están causando”.