O grupo socialista de Noia presentou para o seu debate en pleno unha moción relativo ao estado no que se atopa o carril bici do paseo marítimo e sobre a necesidade de incorporar máis infraestruturas para bicicletas noutros recantos da contorna municipal, cousa que a agrupación considera que é clave, xunto coa redución de velocidade a 30 quilómetros, para “que os viandantes e os vehículos sen motor vaian gañando terreo fronte ao coche”. Ao seu xuízo, “débese mellorar a seguridade e a sinalización nos lugares axeitados para que os desprazamentos sexan máis seguros”.
Consideran dende o grupo que o Goberno local “debe priorizar o arranxo dos carrís bici situados no paseo marítimo, e comezar a estudar o aumento de zonas para poder ir en bicicleta de maneira segura nas estradas de titularidade municipal, con espazos adaptados e sinalización axeitada”. Asemade, solicitan que se pida ás administracións correspondentes que “fagan o mesmo para poder crear rutas seguras de desprazamento polo termo municipal, como ir ás praias ou ir ata Noia dende as distintas parroquias”.
O voceiro municipal Roberto Iglesias indica: “Pódese comprobar que o carril bici que está situado no paseo marítimo está en mal estado, con fochancas que poden provocar caídas nunha zona moi concorrida polas familias. Nos últimos anos non se levou a cabo ningún mantemento para arranxar o firme ou mellorar a sinalización”.
