O mariñeiro Pablo Costas, que leva retido en Iemen desde setembro de 2020 baixo un cargo de suposta pesca ilegal, deixará ese país este xoves, nun voo dirección ao Cairo, segundo confirman fontes do sindicato CUT.
Costas tomará un voo no aeroporto iemení de Seiyun ás 10,30 horas (hora local) en dirección á capital exipcia. Alí, a embaixada española reservoulle unha habitación nun hotel e, de momento, aínda non se sabe cando poderá voar desde O Cairo a España.
Este mariñeiro de Bueu patrón do buque ‘Cobija”, foi detido en setembro do ano pasado, cando se atopaba en porto da o Mukallah, en Iemen, xunto ao resto da súa tripulación (máis dunha trintena de persoas de diferentes nacionalidades), a pedimento das autoridades australianas, baixo unha acusación de suposta pesca ilegal.
Posteriormente, foi condenado a tres meses de arresto e, tras cumprilos, o fiscal presentou un recurso para paralizar a súa repatriación. Ao longo dos últimos meses, a CUT e a súa familia denunciaron a situación na que Pablo e os seus compañeiros estaban “secuestrados” no barco, chegando nas últimas semanas a estar sen comida, nin atención sanitaria, a pesar das condicións “insalubres” que tiñan.
O Ministerio de Asuntos Exteriores confirmou a súa liberación o pasado domingo, tras as xestións realizadas.