Durante os últimos días de agosto e primeiros se setembro leváronse a cabo en Noia tarefas de limpeza no palco da música da Alameda, co fin de devolverlle o esplendor a este importante elemento patrimonial do centro da vila. Os operarios do Concello estiveron limpando a pedra das pintadas e graffitis que afeaban o mesmo.
O Concello explicou que con estes traballos, sumados ás melloras que se realizaron con anterioridade, coma o pintado, a reparación e a substitución da madeira e o pintado de varandas, poñen fin á reparación completa do palco.
Dende o Concello de Noia aproveitaron o desenvolvemento destas tarefas para facer un chamamento a prol “do civismo e respecto”, esperando que o palco “non se converta nun novo lenzo no que facer pintadas que non fan máis que afear un elemento histórico da nosa vila”.
