A Xunta eliminou dous puntos de vertido de augas residuais á ría de Muros, no concello de Noia.
Os técnicos do Plan de Control de Vertidos, dependente de Augas de Galicia, localizaron estes focos na parroquia de Barro, no marco das inspeccións rutineiras no dominio público dos municipios.
As comprobacións realizadas polos técnicos da Xunta permitiron comprobar que os vertidos procedían dunha rede de pluviais que recibía vertidos de vivendas unifamiliares e, ademais, dun tramo da rede de saneamento que recibía o vertido de distintos inmobles.
A entidade local acometeu as actuacións oportunas dirixidas a solucionar as incidencias, mediante construción dun colector unitario e a conexión cara á estación de bombeo dos focos contaminantes na rede de pluviais.
Os técnicos da Xunta realizaron unha nova inspección á zona, verificando que a finalización das actuacións permitiron o cese dos puntos de vertido e a inexistencia de afección no dominio público.
