Ao abeiro da liña de traballo despregada para incrementar a superficie verde no termo municipal, o Concello está a desenvolver traballos de acondicionamento na contorna de Padín. En concreto, as brigadas municipais de obras e xardíns colaboran para ampliar a zona axardinada emprazada a carón da rotonda de Padín, baixo o mural dedicado á festa da Dorna que se sitúa no arranque da avenida da Coruña.
En concreto, esta área será incrementada coa plantación de oito photineas e dúas oliveiras, ademais de céspede. Asemade, instalarase novo mobiliario urbano.
O Concello lembra que este verán tamén se creou outra zona verde lindeira á devandita, diante do aparcadoiro situado xunto ao establecemento comercial Gadis Híper, onde foron plantados catro metrosideros e un seto de euonymus.
