O Concello de Boiro compartiu este xoves información relevante para a cidadanía sobre a Certificación Galega de Competencias Dixitais en Ofimática (CODIX). Segundo informou, o Diario Oficial de Galicia publica este 23 de setembro a convocatoria das probas de avaliación de carácter libre para a obtención do dito certificado, cuxo prazo de inscrición está está aberto dende as 00.01 horas do venres 24 de setembro e ata as 24.00 horas do venres 30 de setembro.
O Concello de Boiro, a través da aula CeMIT, oferta durante o mes de outubro a formación necesaria para a obtención deste título, con contidos como procesador de texto Writer e elaboración de presentación Impress; folla de cálculo Calc e base de datos Base.
“Esta formación acredita os coñecementos, capacidades e aptitudes no ámbito da Tecnoloxías da Información e as Comunicacións (as TIC) que as persoas precisan para desenvolverse con eficiencia no manexo de aplicacións ofimáticas na xestión da información e a documentación e que constitúen o Plan formativo ofimático de Galicia”, explica o Concello.
As probas de avaliación terán lugar nas dependencias da aula CeMIT en cada localidade. As inscricións deben facerse a través da web cemit.xunta.gal. Toda a información sobre as probas no Centro Social de Boiro, no enderezo electrónico axentetic@boiro.org, no teléfono 981 84 26 35 ou vía Whatsapp no 629 769 139.
