Raquel Queizás recala este xoves en Boiro cos contos de Mariña

A actriz, autora e contadora Raquel Queizás estará esta semana en Boiro, o xoves 26, para ofrecer un novo feixe de recursos dos que botar man para facer voar a nosa imaxinación e a nosa creatividade. Trátase do espectáculo Mariña, contos nacidos no mar, especialmente concibido para público familiar. Será no Coído, detrás do IES Praia Barraña, a partir das 12.00 horas.

Novamente o aforo será limitado. A reserva de entradas pode facerse na web municipal dende dous días antes da función.

Mariña e as súas historias

Mariña, contos nacidos no mar é un espectáculo de narración oral no que se empregan obxectos, monicreques e a interacción co público para coñecer a Mariña e as súas historias.

Mariña foi unha serea galega que viviu entre nós hai moitos anos. Ao seu fillo contáballe lendas e mitos dos seres mariños que poboaban os fondos do mar.

No espectáculo de Queizás cóntasenos como a serea sae da auga para compartir todas as súas historias con nós e para traernos unha mensaxe moi urxente do océano: que o coidemos, que non esquezamos que nas súas augas naceu a vida e que é a casa de moitos animais e plantas, ademais de nos servir de fonte de alimento, traballo e riqueza a nós, os seres humanos.