A consulta pública a glorieta do cruce da Barquiña (Noia) e as beirarrúas até a rúa Calvario

A Consellería de Infraestruturas e Mobilidade vén de someter a información pública o proxecto de construción dunha glorieta no cruce da Barquiña, así como a renovación das beirarrúas dende ese punto até a rúa Calvario (á altura da Capitanía Marítima). Esta actuación suporá un investimento de 1’15M€.
O prazo para presentar alegacións (que se poden facer en liña) abriuse este 18 de agosto e ficará deste xeito até o 28 de setembro.

As dúas accións previstas buscan mellorar a seguridade viaria da contorna.

Dunha banda, executarase unha nova glorieta na intersección existente no punto quilométrico 71+120 na AC-550 -cruce coa estrada provincial DP-5704 ao porto da Barquiña. Segundo explica a Consellería, o trazado da glorieta “foi definido tendo en conta o espazo dispoñíbel, resultando unha calzada anular cun radio exterior de 13 metros”.

Doutra banda, renovaranse as beirarrúas dende a nova glorieta ata a alameda de Noia, entre os puntos quilométricos 71+100 e 72+400 da AC-550. Isto “implicará unha reorganización da sección transversal da estrada autonómica, na que a día de hoxe hai aparcamento insuficiente en ambas marxes, o que provoca que os vehículos se suban á beirarrúa e a deterioren”, explícase.