Este domingo 15 de agosto, con saída ás 10.30 horas, celebrouse en augas de Noia e Outes a dezanove edición da Travesía Solidaria a Nado entre Testal e O Freixo, unha iniciativa deportiva e social a prol da integración dos colectivos con diversidades funcionais ou cognitivas e a prol da promoción do deporte adaptado.
Este ano, novamente condicionado pola COVID-19 e as medidas restritivas, foron 75 os nadadoras e nadadores os que finalmente botáronse a auga.
Dende a Concellería de Deportes que dirixe Laura Salgado felicitaron o labor de organización e impulso do Clube Adeco Noia, e en especial ao seu presidente, Pepe Barrio, polo “seu enorme traballo no desenvolvemento desta proba”. Tamén agradeceron encarecidamente a colaboración das entidades que pecharon fileiras arredor deste evento solidario: Cruz Vermella Noia, Confraría San Bartolomé Noia, Club do Mar Noia e Asociación Misela.
Unha vez máis a travesía de Testal a O Freixo non foi unha proba competitiva. Consistiu nunha xornada de promoción do deporte no colectivo de persoas con discapacidade e o fomento da integración e a inclusión a través da actividade deportiva.
