Noiadeportes.es permítenos facer seguimento da participación de Caetano Horta nos Xogos Olímpicos

A nosa comarca ten un deportista olímpico participando nos Xogos de Toquio, o remeiro noiés Caetano Horta, e tanto as redes sociais como os faladoiros de toda a vida ferven de información e expectación arredor da súa presenza no acontecemento deportivo máis importante a nivel mundial.

O Concello de Noia, se ben tiña previsto facer unha quedada para seguir a participación do remeiro local para enviarlle ánimos de de maneira colectiva (quedada que tivo que ser cancelada para seguir mantendo a seguridade sanitaria nestes tempos de ascenso da incidencia), está a envorcar esforzos nas redes sociais e (sobre todo) na web Noiadeportes.es para informar de todo o relativo á participación de Caetano, seguíndoa en directo e atendendo a todos os detalles relativos á súa presenza nos xogos.

Por certo que a primeira eliminatoria na que participará Caetano Horta será o vindeiro sábado 24 de xullo ás 04:20 h. O Concello, reflectindo o sentir da veciñanza e da comarca por enteiro, envioulle ao remeiro a mellor das sortes posíbeis e encheu diferentes recantos da vila con pancartas nas que se lle comunican mensaxes de ánimo.

Outra das canles onde se ofrece información detallada e actualizada é o Facebook da área de Deportes do Concello, onde, entre outros datos de interese sobre o remeiro, achegaron a seguinte mensaxe: “Para a nosa vila é un orgullo ter un deportista olímpico, un orgullo que en Toquio se fale de Noia. Como non podía ser doutro xeito o pobo está envorcado con Caetano Horta, son máis de 10.000 quilómetros de distancia pero o noso campión vai a sentir o noso apoio, o noso ánimo”.