Na tarde deste 28 de xullo inaugurouse en Noia o primeiro economato solidario nunha sede parroquial de Cáritas pertencente á diocese de Santiago.
O acto contou coa presenza do arzobispo de Santiago, monseñor Julián Barrio, o párroco da vila, José Ortoño, o alcalde, Santiago Freire, e os concelleiros Juan González e Marisol Villar, así como o presidente de Cáritas de Noia, Juan Carlos Pérez e o director de Cáritas Diocesana de Santiago, Luis Calviño.
Neste economato os usuarios van poder recoller produtos de primeira necesidade a custe cero e recibirán un vale ficticio ao mes que poderán trocar por bens que precisen. O novo local está emprazado no número 16 do malecón de Gasset, a pouca distancia de onde ten a sede a organización humanitaria noiesa.
