Este mércores 28 de xullo, ás 12.30 horas, a Casa da Cultura de Porto do Son vai dar acollida a unha charla de presentación do certame Noia Harp Fest, o único acontecemento musical e divulgativo centrado na cultura arpística dentro do noroeste ibérico, que vai celebrar a súa sétima edición entre o 4 e o 6 de agosto. Na charla participarán os representantes dalgunhas das principais entidades que colaboran na organización deste importante evento musical e cultural, como o Concello de Noia, a Deputación da Coruña, o Concello de Porto do Son ou a Asociación Cultural Barbantia.
Referente internacional
Noia converterase novamente nun punto de encontro para músicos de toda Europa e América, procedentes de Italia, Bretaña, Lituania, Francia, Paraguai, Galicia, Euskadi, Cataluña e Andalucía. Acudirán artistas tan sobranceiros como a italiana Marianne Gubri, o bretón Tristan le Govic (en formato trío), a andaluza Ana Crisman e agrupacións como a banda vasca Basabi. Por estilos, o abano de proposta promete ser amplo e variado (música clásica, folk, flamenco, vangarda), malia ser a arpa o nexo común das contribucións.
Noia Harp Fest incorpora este ano un novo escenario a ceo aberto, os xardíns da Central Hidroeléctrica do Tambre, que se suma ao habitual da praza do Tapal; mentres que Santa María A Nova acollerá os obradoiros de arpa.
Haberá gratuítos para o público, ao aire libre, de intérpretes destacados deste instrumento.
Nnesta edición do Noia Harp Fest tamén estarán presentes, como é habitual, os músicos galegos. É o caso de Pedro Lamas. O creador e compositor acompañará a Aiste Bruzaite nun concerto de kanklès, un instrumento de corda popular lituano moi popular neste país e na súa contorna.
