As obras do paseo Portas do Mar de Noia enfían a recta final

O Concello de Noia deu máis detalles sobre a evolución do proxecto do paseo Portas do Mar, cuxas obras da última fase xa están “practicamente rematadas” co empedrado integral do acceso á rúa do Forno. A previsión é rematar as tarefas ao longo destes días, completando a obra coa colocación do alumeado para así dar por concluído o paseo.

Esta actuación supón un importe aproximado de 60.000 euros. Estes traballos, unidos ás reformas previas da contorna, van dirixidos a impulsar e mellorar a conexión do rueiro do centro histórico coa ría.

Amais, no Malecón de Gasset estase traballando nos últimos retoques para finalizar a fachada marítima, que nos vindeiros días quedará rematada para poder transitar.